21 қыркүйекте С. Торайғыров атындағы Павлодар мемлекеттік университетінде М.Ж. Көпеевтің 160 жылдығына арналған «Мәшһүртанудың ғылыми негіздері – «Мәңгілік ел» ұлттық идеясы» атты Халықаралық ғылыми-тәжірибелік конференция өтеді.
 М. Көпеевтің көпқырлы шығармаларын конференция алаңында талқылау үшін лингвистика, филология, тарих және философия салаларында еңбегі сіңген сарапшылары бас қосады.
 Конференция барысында деректі фильмнің көрсетілімі, сонымен қатар, М.Ж. Көпеевтің мәдени мұрасын насихаттау мен зерттеуге сүбелі үлес қосқан оқушылар мен олардың ата-аналарын Алғыс хаттармен марапаттау шарасы өтеді.
 Павлодар облысының аудандарымен тікелей байланыс конференцияның ерекшелігі болмақ.
 Конференция барысында онлайн-трансляция болады. Бұл шараның ерекшелігіна айналмақ. Бұл басқосуға Павлодар облысының аудандарынан 3000-ға жуық адам және ПМУ-дің 350-дан астам жас ғалымдары мен студенттері қатысады.
 Бұл күні «Мәшһүр Жүсіп әлемі» атты балаларға арналған көрнекі әңгімелер жинағының тұсаукесері өтеді. М. Жүсіп Көпеевтің шығармаларының ізімен жазылған ертегілер авторы – Ж. Аймауытов атындағы этнопедагогика және білім берудің инновациялық технологиялары ғылыми-тәжірибелік орталығының директоры, п.ғ.д., профессор Еңгілік Жұматаева.
 Айта кетейік, кітаптағы иллюстрацияларды сәулет-құрылыс факультетінің студенттері салды.
 Концерттік залдың фойесінде конференция қонақтарының назарына С. Бейсембаев атындағы университеттік ғылыми кітапханасының сирек кітаптар қорындағы М.Ж.Көпеевтің рухани-тарихи мұрасы бойынша кітаптар көрмесі ұсынылады.
 Еске сала кетсек, жоғары оқу орнында 2004 жылдан бері ғылыми-тәжірибелік орталық жұмыс істейді 2006 жылы жаңа кесене бой көтерді. Жерлесіміздің өмірі мен шығармашылығына арналған музей-кабинет ашылып, «Мәшһүртану» пәні енгізілді. М. Ж. Көпеев шығармаларының 20 томдық жинағы мен энциклопедия басылып шықты.
 Бүгінде М.Ж Көпеевтің мұрасын зерттеуге қызығушылық танытқан жас ғалымдардың қатары артуда. Олардың қатарында Қазақстан, АҚШ, Түркия, Жапония елдерінің азаматтары бар.
 Конференция қонақтары алдында Үндістан және Польша елдерінің ғалымдары сөз алады. Кришан Лобиял Джавахарлал Неру зерттеу университеті, компьютерлі және жүйелі ғылымдар факультетінің деканы және ақпараттық ғылымдар докторы, профессор (Нью-Дели, Үндістан) мен Михал Адамиак Варшава археологиялық институтының өкілі онлайн режимде байланысқа шығады.